Xalq ta`limi vazirligi tomonidan “Yangi o'quv yilida ta`lim-tarbiya sifatini oshirishdagi ustuvor vazifalar” mavzusida matbuot anjumani o'tkazildi.

Matbuot anjumaniga taklif etilgan jurnalistlar dastlab Toshkentning Mirzo Ulug'bek tumanidagi 426-maktabgacha ta`lim muassasasiga tashrif buyurib, bu yerdagi bolalarni maktabga tayyorlash jarayoni bilan tanishdilar. Shuningdek, farzandi maktabgacha ta`lim muassasasiga bormaydigan bolalarning ota-onalari uchun davlat byudjyeti mablag'lari hisobiga chop etilgan 5 nomdagi qo'llanmalarini tarqatish va ulardan foydalanish jarayonining guvohi bo'lishdi. Jurnalistlarda muassasada tashkil etilgan ingliz tili, tasviriy san`at, raqs to'garaklari va jismoniy tarbiya mashg'ulotlari katta taassurot qoldirdi.

Shundan so'ng anjuman qatnashchilari Mirzo Ulug'bek tumanidagi 64-umumta`lim maktabiga tashrif buyurib, bu yerda yangi o'quv yilini munosib kutib olish maqsadida amalga oshirilgan ishlar bilan tanishishdi. Xususan, ta`lim muassasasidagi chet tili kabinetlari, boshlang'ich sinflarning jihozlanishi, darslik va o'quv qo'llanmalar bilan ta`minlanishi, malakali yosh pedagoglarni jalb qilish, an`anaviy avgust kengashlarini o'tkazish borasida ko'rilgan chora-tadbirlar haqida batafsil ma`lumot berildi.

Tadbirda O'zbekiston Respublikasi xalq ta`limi vaziri Ulug'bek Inoyatov jurnalistlarga yangi o'quv yiliga tayyorgarlik ko'rish maqsadida vazirlik tomonidan amalga oshirilgan ishlar, yangi o'quv yilidagi yangiliklar, ta`lim muassasalarida “Betakrorimsan, yagonasan, ona Vatanim - O'zbekistonim!” ezgu g'oyasini o'zida mujassam etgan “Mustaqillik darslari”ni o'tkazish, maktab bozori va yarmarakalari faoliyatini tashkil etish bilan bog'liq masalalar xususida batafsil ma`lumot berdi.

Ommaviy axborot vositalari xodimlari o'zlarini qiziqtirgan savollarga atroflicha javob olishdi.