Toshkent shahri yashash uchun eng maqbul shaharlar reytingiga kiritildi. Dunyoning 140 ta shaharidan tashkil topgan ushbu reytingni Economist Intelligence Unit tadqiqot kompaniyasi tuzdi.
U yoki bu shaharda hayot uchun qulayliklarni aniqlash uchun quyidagi omillar bo‘yicha baho berildi: sog‘liqni saqlash tizimi, barqarorlik, ekologiya, madaniyat, ta'lim tizimi va infratuzilma.
O‘zbekiston poytaxti 54,6 ball yiqqan holda ushbu reytingda 116-o‘ringa loyiq deb topildi. Xususan, Toshkent barqarorlik bo‘yicha 50 ball, sog‘liqni saqlash tizimi – 58,3 ball, ekologiya va madaniyat – 53 ball, ta'lim tizimi – 75 ball va infratuzilma bo‘yicha 48,2 ball to‘pladi.
Melburn (Avstraliya), Vena (Avstriya poytaxti) va Vankuver (Kanada) dunyoda yashash uchun eng maqbul shaharlar deb topildi. Tripoli (Liviya poytaxti), Lagos (Nigeriya), Morsbi (Papua-Yangi Gvineya poytaxti), Dakka (Bangladesh poytaxti) va Damashq (Suriya poytaxti) esa, aksincha, yashash uchun eng nomaqbul shaharlar deb topildi.