85 yoshli Rossiya xalq artisti Mixail Svetin yakshanba, 30 avgust kuni tongda Gatchin tuman markaziy shifoxonasida hayotdan ko‘z yumdi, deya xabar berdi tuman ma'muriyati matbuot xizmati.
Nikolay Akimov nomidagi Sankt-Peterburg akademik komediya teatri badiiy rahbari Tatyana Kazakovaning “Govorit Moskva” radiosiga ma'lum qilishicha, Svetin bilan xayrlashuv marosimi 2 sentabr kuni bo‘lib o‘tadi.
Mixail Svetin 23 avgust kuni zudlik bilan shifoxonaga yotqizilgan edi. Ma'lumotlarga ko‘ra, unga gemmoragik insult tashhisi qo‘yilgan. 24 avgustda uning ahvoli og‘ir ekani ma'lum qilingan.
Mixail Svetin so‘nggi vaqtlarga qadar Nikolay Akimov nomidagi Sankt-Peterburg akademik komediya teatrida faoliyat olib borgan.
U Georgiy Daneliyning “Afonya”, Leonid Gaydayning “Bo‘lishi mumkin emas!”, Mark Zaxarovning “12 stul” filmlari bilan tanilgan. Hammasi bo‘lib 100dan ziyod filmlarda rol ijro etgan.