"Manchester Yunayted" jamoasi bosh murabbiyi Lui van Gaal jamoaning sobiq futbolchilari tomonidan bildirilayotgan tanqidlarga munosabat bildirdi. U ayni vaqtda Britaniyadagi telekanallarda ekspertlar sifatida faoliyat olib borayotgan sobiq futbolchilar, "qizil iblislar"ning sobiq himoyachisi Rio Ferdinand va "sariq iblis" Pol Skoulzga qarata murojaat qilgan.
"Albatta, keyingi yarim yil davomida mening kelajagim xususida olib borilgan muhokamalar jonimga tegdi. Men barchaga kitobni qanday ochishni ko‘rsatib berdim. Shunga qaramasdan men va jamoa doimiy ravishda OAV hamda jamoaning sobiq futbolchilari tomonidan tanqid qilib kelindi. Ularning tanqidlari jamoaga yordam bermaydi. Men shu yerda ekanman, jamoa kurashishda davom etadi. Men o‘zimga, "MYu"ga va shogirdlarimga ishonaman", deya van Gaalning so‘zlarini keltiradi Goal.com.
Bugun jamoa APLning so‘nggi turida "Bornmut"ga qarshi maydonga tushadi. Jamoa keyingi mavsumda YeChLda ishtirok etishga yo‘llanma beruvchi to‘rtinchi o‘rin uchun nazariy jihatdan imkon saqlab qolgan. Buning uchun "qizil iblislar" o‘z uchrashuvida g‘alaba qilishi va parallel ravishda kechadigan "Suonsi" va "Manchester Siti" uchrashuvida uelsliklar g‘alabasiga umid qilishi kerak bo‘ladi.