Qozog‘istonda Aqto‘bedagi terakt qurbonlari xotirasi uchun e'lon qilingan motam kuni boshlandi.
Motam munosabati bilan davlat muassasalarida bayroqlar tushirilgan, televideniye va radiolarda reklamalar to‘xtatilgan va ko‘ngilochar dasturlar bekor qilingan.
5 iyun kuni radikal oqim a'zolari Aqto‘bedagi ikkita qurol-aslaha do‘koniga va harbiy qismga hujum qilib, 7 kishini o‘ldirishdi. Otishmalar vaqtida jami 37 kishi turli darajada jarohat olgan. Jangarilarning 13 nafari aksilterror amaliyotlar natijasida yo‘q qilingan, yana 9 kishi qo‘lga olingan. Ayni vaqtda 6 kishini qidirish ishlari davom etmoqda.
Qozog‘iston prezidenti Nursulton Nazarboyev 8 iyun kuni Aqto‘be shahrida sodir etilgan qo‘poruvchilik harakatlari qurbonlari xotirasiga 9 iyunni mamlakat miqyosida milliy motam kuni deb e'lon qilish to‘g‘risidagi farmoyishni imzolagandi.
Nursulton Nazarboyev bu hodisalarda "rangli inqilob" alomatlarini payqaganini aytdi va guruh xorijdan ko‘rsatma olgani haqida gapirdi. U bu terakt ijrochilarining barchasini yo‘q qilishga ko‘rsatma bergan.