Shu yilda taqdim etilishi mo‘ljallangan Xperia F8331 smartfoni niqobi ostidagi Sony'ning yangi flagmani suratlari GSMArena saytida paydo bo‘ldi. "Ayg‘oqchi" rasmlarda ko‘rinib turganidek, yangi smartfonning ko‘rinishi Z-seriya dizaynidan katta farq qiladi: uning yuqori va pastki yuzalari tekis, chetlari esa qayrilgan.
Uning old panelida dinamikalari va NFC-antennalari joylashgan, orqasida esa - kameraning yangi tuzilmasi va ikkilamchi LED-chaqmoqlari. Xperia F8331 smartfonining pastki qismida USB Type-C portini ko‘rish mumkin, yuqori qismida esa - 3,5 millimetrli audiokirish.
Manbaga ko‘ra, yangi qurilmaning ekrani Xperia X Performance'dan biroz kattaroq bo‘ladi. Bundan tashqari flagmanning ikkita - old va orqa kamerasi ham - videoni 4K-sifatda tasvirga olish imkoniga ega bo‘ladi.
Xperia F8331 smartfonining taqdimot muddati noma'lum, lekin u yil oxirigacha chiqishi kerak. Yangi qurilma 2016 yilning sentabrida Berlinda bo‘lib o‘tadigan IFA ko‘rgazmasida namoyish etilishi mumkin, zero Sony'ning unda ishtirok etishi oldindan ma'lum.
