Braziliya Federal senati (parlament yuqori palatasi) a'zolarining ko‘pchilik qismi 9 avgust, seshanba kuni avvalroq mamlakat prezidenti lavozimidan vaqtinchalik chetlashtirilgan Dilma Russeffga nisbatan impichment jarayonini davom ettirishni yoqlab ovoz berishdi - 59ga 21 nisbatida. Uning taqdiri hal qilingan majlis 15 soatdan ortiq vaqt davom etgan.
Yuqori palataning plenar majlisini senator Antoniu Anastasia ochib berdi. U deputatlarni Russeffning iste'fosi zarurligini asoslashga yo‘naltirilgan hisobotidan parchalar bilan tanishtirdi. Shundan so‘ng qolgan 80 senatorning har biri hamkasblari qarshisida 10 daqiqadan chiqish qilish imkoniyatiga ega bo‘ldi. Nihoyat, so‘z navbati Russeffning iste'fosi jarayoni tashabbuskorlari hamda prezident advokatiga berildi — har bir tomonga yarim soatdan vaqt ajratildi. Barcha chiqishlar yakunlangach, senatorlar ovoz berishga kirishishdi.
Braziliya qonunchiligiga ko‘ra, jarayonning yakuniy bosqichida senatorlar Russeffga qarshi surilgan ayblovlarni yana bir marta tahlil qiladi, himoya tomoni va guvohlarni tinglaydi, so‘ng prezident iste'fosi masalasi bo‘yicha qaytadan ovoz beradi. Yakuniy hukm avgust oxiri — sentabr boshida chiqarilishi kutilmoqda.
Russeffning impichmenti tarafdorlari uni moliyaviy qonunbuzarliklarda ayblamoqda. Jumladan, prezident ikkinchi mandatining dastlabki oylarida parlament bilan maslahatlashmay byudjyet mablag‘larini ajratish borasida bir qancha farmonlarni imzolashda hamda davlat banklariga ajratiladigan to‘lovlarni ortga surishda ayblangan.