Fransiya prezidenti Fransua Ollandning fikricha, qo‘poruvchiliklarning oldini olish va terrorizmga qarshi kurashish uchun qo‘shimcha mablag‘lar zarur. RIA Novosti axborot agentligining xabar qilishicha, fransuz davlat rahbari Parijdagi teraktlar qurbonlari xotirasiga bag‘ishlangan anjumanda shunday fikrni bildirgan.
«Biz amalga oshirilgan harakatlarimizning barqarorligini ta'minlashimiz zarur. Men, qo‘poruvchiliklarning oldini olish, ularga xalaqit berish va barham berish borasidagi barcha vositalar haqida so‘zlayapman. Bularning barchasi doimiy ishlashni talab qiladi. Buning uchun hatto, men qabul qilgan choralarni kuchaytirish uchun qo‘shimcha zaxiralar ham talab qilinadi», — degan Olland.
Prezident shuningdek, terakt qurbonlari uchun kafolat jamg‘armasi qoidalari va uning faoliyatiga o‘zgartishlar kiritilishini ma'lum qilgan.
