Neft eksport qiluvchi mamlakatlar, qora oltin bozoridagi vaziyatni barqarorlashtirishga qaratilgan bitimga yaqin turibdi. Shu haqda fikr bildirgan Venesuela prezidenti Nikolas Maduro so‘zlarini TASS agentligi keltirmoqda.
«Umid qilamizki, biz shu oyda neft narxini barqarorlashtirish uchun kelishuv haqida e'lon qila olamiz», — degan Maduro, Venesueloning Margarita orolida bo‘lib o‘tgan Qo‘shilmaslik harakati sammiti yakunida.
Davlat rahbarining so‘zlariga ko‘ra, Venesuela sammitda ishtirok etgan OPeK mamlakatlari davlat rahbarlari, xususan Eron prezidenti Hasan Ruhoniy bilan muzokaralar o‘tkazgan.
«Eron rahbari neft bozorini barqarorlashtirish uchun juda zarur va adolatli choralarga Tehron o‘z hissasini qo‘shishga tayyorligini bildirdi. Bu juda yaxshi yangilikdir», — degan Maduro.
19 sentabr kungi ilk savdolarga oid ma'lumotlarga ko‘ra, Londonning ICE birjasidagi Brent rusumli neftning bir barreli 46,53 dollardan sotilmoqda. Bu o‘tgan hafta oxiridagi narxdan 1,66 foizga yuqoridir.
