Yaponiya imperatori Akixitoning 10 yoshli nabirasi shahzoda Xisaxito yo‘l-transport hodisasi qurbonlari yod olinadigan kunda yo‘l-transport hodisasiga uchradi. Yahoo! Japan nashri xabar berishicha, u onasi malika Kiko bilan ketayotganida falokatga yo‘liqqan.
Avtohalokat Kanagava prefekturasining Sagamixara shahrida ro‘y bergan.
Yaponiya imperator oilasi xonadoni vakillarini olib ketayotgan avtomobil oldinda ketayotgan mashinaga borib urilgan, biroq bunda aynan kim aybdor ekani hozircha ma'lum emas.
Imperator saroyi boshqarmasining bildirishicha, imperator oilasi vakillari jabrlanmagan.
Hodisa bo‘yicha tekshiruv ishlari olib borilmoqda.
Ma'lumot uchun, malika Kiko imperator Akixitoning kichik o‘g‘li shahzoda Akisinoning turmush o‘rtog‘i bo‘ladi.