Bugun Xalq deputatlari Surxondaryo viloyat kengashining navbatdan tashqari sessiyasi bo‘lib o‘tdi. Unda O‘zbekiston Prezidenti Shavkat Mirziyoyev ishtirok etdi.
«Kun» manbasi ma'lum qilishicha, sessiyada shu kungacha Navoiy viloyati hokimi sifatida faoliyat ko‘rsatib kelgan Erkinjon Oqbo‘tayevich Turdimov Surxondaryo viloyatiga yangi hokim etib tayinlandi.
Hozircha Surxondaryo viloyati hokimligi saytida bu haqda ma'lumot yo‘q.
2015 yil yanvarida viloyat hokimi etib tayinlangan Tojimurod Normurodovich Mamaraimov viloyatning Qiziriq tumani rahbarligiga o‘tkazilgan.
Ma'lumot uchun, joriy yilning 24 sentabr kuni Surxondaryo viloyatida besh tuman hokimi ishdan bo‘shatilgan edi.
Erkinjon Oqbo‘tayevich Turdimov 1969 yili Samarqand viloyati, Qo‘shrabot tumanida tug‘ilgan. 1991 yilda Toshkent xalq xo‘jaligi institutini tamomlagan. Mutaxassisligi iqtisodchi. O‘zbekiston Respublikasi Oliy Majlisi Senati a'zosi. Oilali, uch nafar farzandi bor.
Mehnat faoliyati:
1991-1993 yy. - “O‘zsanoatqurilishbanki” Sirdaryo filiali qarz reja bo‘limi mutaxassisi, investitsiya qurilish va ta'minot tashkilotlarini moliyalashtirish va qarz berish bo‘limi bosh mutaxassisi, pul muomalasi bo‘limi boshlig‘i o‘rinbosari;
1993-1995 yy. - “O‘zsanoatqurilishbanki” Zarafshon bo‘limi boshqaruvchisi;
1995-1996 yy. - Zarafshon shahar hokimi o‘rinbosari;
1996-2000 yy. - Tashqi iqtisodiy faoliyat Milliy bankining Navoiy bo‘limi boshqaruvchisi;
2000-2008 yy. - Xatirchi tumani hokimi;
2008-2008 yy. – O‘zbekiston Respublikasi Qishloq va suv xo‘jaligi vazirining qishloqda iqtisodiy islohotlar masalalari bo‘yicha birinchi o‘rinbosari;
2008 yildan 2016 yilgacha - Navoiy viloyati hokimi.
