Qirg‘iziston prezident Almazbek Atamboyevning O‘zbekistonga qilgan tashrifidan mamnun. Bu haqida prezidentning tashqi siyosat bo‘limi rahbari Sapar Isoqovning so‘zlariga asoslanib, 24.kg sayti ma'lum qildi.
"Samarqandga tashrifimiz yuqori darajada kechdi. Biz safar natijalaridan juda mamnunmiz. Ikki tomonlama muzokaralarda bugungi kundagi muhim bo‘lgan deyarli barcha masalalar muhokama qilindi", - dedi u.
Ikki davlat rahbari uchrashuvi davomida aynan qanday loyihalar muhokama etilgani to‘g‘risidagi savolga Sapar Isoqov shunday javob berdi: "Shuni alohida ta'kidlamoqchimanki, bizning munosabatlarimiz ijobiy tus olgan. Men muzokaralar yakunlari bo‘yicha qo‘shimcha brifing o‘tkazilgunga qadar bu haqida gapirishni istamasdim".
"Shu jumladan mintaqaviy loyihalar ham muhokama qilindi. Bizning xitoylik hamkasblarimiz Buyuk ipak yo‘li bo‘yicha loyihalar taklif qilishdi. Masalan, u yerda uch tomonlama temir yo‘l qurish loyihasi bor. O‘zbek do‘stlarimiz XXRning bu g‘oyasini qo‘llab-quvvatlashdi. Umuman olganda, bu uch tomonlama formatda muhokama qilinadi", - deya qo‘shimcha qildi Sapar Isoqov.
