AQShning saylangan prezidenti Donald Tramp o‘zining inauguratsiya nutqini mustaqil yozish istagini bildirdi, deb yozmoqda Washington Post nashri so‘nggi kunlarda respublikachi prezident bilan uchrashganlarga asoslangan holda. U mamlakatning sobiq prezidentlari Ronald Reygan va Jon Kennedidan ilhomlangan holda, shunday yo‘l tutmoqchi.
Ta'kidlanishicha, yangi prezident lavozimiga kirishish tantanasidagi ayrim jihatlarini allaqachon ma'lum qilgan. Matnni yozishda Trampga spichrayter (nutq yozuvchi) Stiven Miller maslahat bermoqda. Tramp ma'muriyatida siyosiy masalalar bo‘yicha bosh maslahatchi lavozimini egallashi kutilayotgan Miller, respublikachining saylovoldi kampaniyasi chog‘idagi nutqlarini ham yozib bergan edi.
«Trampning so‘zlariga ko‘ra, Reyganning «ajoyib uslubi» va Kennedining milliy manfaatlarga bergan urg‘ulari o‘zining 20 yanvardagi ma'ruzasini yozishda namuna vazifasini o‘tashi kerak», — deyiladi nashrda.
Ismi oshkor qilinmagan manbaning so‘zlariga ko‘ra, saylangan prezident Kennedining «mamlakatni Oyga parvoz qilishga ruhlantirish qobiliyati»dan ilhomlangan.
