Yaponiyalik futbolchi, ayni vaqtda 49 yoshda bo'lgan Kazuyoshi Miura «Yokogama» bilan shartnomasini uzaytirdi.

The Japan Times xabariga ko'ra, u Yaponiyaning ikkinchi divizioni jamoasida yana bir yillik shartnomaga ega.

Shu tariqa, dunyoning eng keksa futbolchisi bo'lib turgan Miura faoliyatidagi o'ttiz ikkinchi mavsumni o'tkazadi. 26 fevral kuni u 50 yoshini qarshilaydi.

Ma`lumot uchun, 1967 yilda tug'ilgan yaponiyalik futbolchi o'z faoliyatini 1986 yilda, Braziliyaning «Santos» klubida boshlagan. U Italiya A Seriyasida ham to'p surgan, 1994 yilda Miura «Jyenoa» sharafini himoya qilgandi.

Miura «Yokogama» safida 2005 yildan buyon to'p surib keladi. U Yaponiya terma jamoasi bilan 89 uchrashuvda maydonga chiqqan va 55 gol urgan. 

Yaponiyaning O'zbekiston milliy terma jamoasiga qarshi uchrashuvlarida maydonga chiqqan Kazuyoshi Miura O'zbekiston termasi darvozasiga 5 ta gol (shulardan 4 tasini bitta o'yinda) urgan.