Iroq Qurolli kuchlari Mo‘sul shahrining g‘arbiy qismini IShID jangarilaridan ozod qilish bo‘yicha harbiy amaliyotga tayyorgarlik ko‘ra boshladi, deb xabar qilmoqda Reyter agentligi.
Iroq xalq safarbarligi kuchlari shaharning Dajla daryosining g‘arbiy sohilida joylashgan hududini ozod qilish bo‘yicha "yaqin ikki-uch kunda amaliyot o‘tkazadi", degan general-leytenant Abdul Amir Rashid Yaralla. Kuni kecha, Iroq mudofaa vazirligining ma'lum qilishicha, mamlakat harbiylari Mo‘sulning Dajla daryosi sharqiy sohillarida joylashgan tumanlarini IShID jangarilaridan batamom ozod qilgan.
Iroq hududida IShIDga qarshi kurashda qurollangan bo‘linmalar muhim o‘rin tutmoqda. Iroq xalq safarbarligi kuchlari 2014 yilda tashkil topgan bo‘lib, o‘tgan yildan e'tiboran Iroq Qurolli kuchlari tarkibiga kirgan.
