Moskva musulmonlari Ma'naviy Boshqarmasining Facebook'dagi sahifasida Rossiya muftiylar kengashi raisi shayx Ravil Gaynutdinning jurnalistlar oldida so‘zlagan nutqi videosi taqdim etildi. Unda shayx hukumatni musulmon tashkilotlarning ishlariga aralashmaslikka chaqiradi. Prezident ma'muriyati yangi rahbarlari (S.V.Kiriyenko va A.V.Yarin)ning vaziyatni atroflicha o‘rganib chiqib, to‘g‘ri qaror chiqarishiga umid bildiradi.
Mazkur videoda muftiy Suriyadagi yordamga muhtoj och-yupun bolalar, Rossiya musulmonlarining ularga ko‘rsatayotgan yordami, shu kabi ijobiy xabarlarning RF televideniyesida yoritilmasligi, buning o‘rniga musulmonlarning salbiy tomonlari ko‘rsatilgan ko‘rsatuvlar uzatilishi haqida kuyunchaklik bilan so‘zlaydi.
Shuningdek Rossiya 1 telekanali orqali haftada bir marta uzatiladigan musulmonlarga bag‘ishlangan ko‘rsatuvning efirga uzatilishi to‘xtatilganiga tanqidiy munosabat bildiradi. "Ularga nima yoqmadi - islom, musulmonlar haqida gapirilganimi?", - deydi shayx Ravil Gaynutdin.
