Qirg‘iziston davlat milliy xavfsizlik qo‘mitasi "Hizb ut-Tahrir" diniy-ekstremistik tashkilotining faol a'zosini qo‘lga oldi. Bu haqda qo‘mita matbuot markazi xabar qilmoqda.
Qo‘mita ma'lumotlariga ko‘ra, ekstremist tashkilotning yashirin faoliyatiga barham berish bo‘yicha o‘tkazilgan maxsus amaliyot chog‘ida qo‘la olingan. "Ushbu amaliyot doirasida O‘sh viloyati Qorasuv shahrining 1959 yilda tug‘ilgan fuqarosi hibsga olindi", - deyiladi xabarda. Uning ismi-sharifi tergov manfaatlari yuzasidan oshkor etilmayapti.
DMXQning ma'lum qilishicha, mazkur fuqaro bundan avval "milliy, irqiy, diniy va mintaqalararo ziddiyat"ni keltirib chiqarganligi uchun jinoiy javobgarlikka tortilgan. Ayni vaqtda, uning uyidan musodara qilingan turli nashrlar asosida jinoiy ish qo‘zg‘atilgan.
Eslatib o‘tamiz, bosh qarorgohi Londonda joylashgan "Hizb ut-Tahrir" tashkiloti Qirg‘iziston va boshqa qator mamlakatlar, xususan O‘zbekistonda ham taqiqlangan. Uning a'zolari Markaziy Osiyo davlatlaridagi hokimiyatlarni ag‘darib, ushbu davlatlar hududida o‘z davlatini barpo qilishni maqsad qiladi.
