Paragvay prezidenti Orasio Kartes mamlakat kongressi davlat rahbariga ikkinchi muddatga saylanishga ruxsat beruvchi tuzatishni qabul qilishidan qat'iy nazar, 2018 yilda o‘tadigan saylovlarda qatnashmasligini aytdi. Bu haqda Reuters axborot agentligi xabar bermoqda.
Kartes arxiyepiskop Asunsonga yo‘llagan maktubida Rim papasi Frantsiskning tinchlik va muloqotga chorlovidan ilhomlanganini ta'kidlab o‘tgan.
31 mart kuni yuqoridagi tuzatishga qarshi chiqayotganlar senat uni yashirincha qabul qilgandan keyin Paragvay kongressi binosiga o‘t qo‘yishgandi. Quyi palata muxolifatning g‘azablanishiga sabab bo‘lgan taklif uchun hali ovoz bermagan.
Paragvayning amaldagi konstitutsiyasi qayta saylanishni taqiqlaydi. U 1992 yilda, 1989 yilda mamlakatda diktatura yo‘q qilingandan keyin qabul qilingan.
