2 may kuni "O‘zbekiston temir yo‘llari" AJ Toshkent shahridagi Milliy matbuot markazida I chorak yakunlari bo‘yicha hisobot berdi.
Tadbirda ishtirok etgan "Kun.uz" xodimiga ko‘ra, matbuot anjumanida 2016-2017 o‘quv yilida temir yo‘llar yo‘nalishi bo‘yicha 2494 nafar talaba kollej va institutlarni tamomlashi kutilayotgani ma'lum qilingan. Bugunga kelib, ularning barchasi "O‘zbekiston temir yo‘llari" aksionerlik jamiyati korxonalariga taqsimlangan. AJ o‘z oldiga bitiruvchilarni 100 foiz ish bilan ta'minlash rejasini qo‘ygani ta'kidlandi.
Shuningdek matbuot anjumanida talabalar va mutaxassislarning chet elda malaka oshirishi masalasiga ham to‘xtalib o‘tildi.
Ma'lumotlarga ko‘ra, bugungi kunda ushbu yo‘nalish bo‘yicha 500 nafarga yaqin o‘zbekistonlik Rossiya Federatsiyasi oliy o‘quv yurtlarida tahsil olmoqda va malaka oshirmoqda. Bundan tashqari, Ispaniya va Germaniya kabi Yevropa mamlakatlari bilan ham hamkorlik yo‘lga qo‘yilib, "O‘zbekiston temir yo‘llari" xodimlari u yerlarga borib, malaka oshirib qaytmoqda.
