Hindistonning shimolidagi Uttarakxand shtatida tog‘lar orasida joylashgan Badrinatx ibodatxonasiga ziyoratga kelgan 14 ming kishi kuchli ko‘chki tufayli tashqi dunyodan uzilib qoldi. Bu haqda Times of India nashri xabar bermoqda.
Dastlabki ma'lumotlarga ko‘ra, ziyoratchilar orasida jabrlanganlar yo‘q.
Nashr ma'lumotlariga ko‘ra, 19 may kuni yuz bergan ko‘chki Chamoli okrugidagi Rishikesh-Badrinatx shossesining 60 metrini qoplab olgan. Bu yo‘l ibodatxona majmuasiga olib boruvchi yagona yo‘l hisoblanadi. Ibodatxona induizmdagi 3 ta bosh ilohdan biri bo‘lgan Vishnu ixlosmandlari orasida ayniqsa hurmat qilinadi. Ibodatxona Himolay etaklarida joylashgan bo‘lib, yilning bu vaqtida bu yerga avtobuslarda ko‘plab odamlar tashrif buyuradi.
Hukumatning ta'kidlashicha, ular ziyoratchilarga zarur yordam ko‘rsatishga tayyor. Yo‘l xizmati xodimlari shosseni ko‘chkidan tozalashni boshlashgan. Yo‘l 20 may kechki vaqtgacha to‘liq tozalanishi kutilmoqda.
