Oliy Majlis Senatining yalpi majlisida «Qayta tiklanuvchi energiya bo‘yicha Xalqaro Agentlik ustavini (Bonn, 2009 yil 26 yanvar) ratifikatsiya qilish haqida»gi qonuni ratifikatsiya qilindi.
Senatorlarning fikricha, ushbu hujjatning ratifikatsiya qilinishi mamlakatning xorijiy davlatlar va xalqaro tashkilotlar bilan munosabatlarini yangi strategik bosqichga olib chiqadi, keng qamrovli hamkorlikni yanada chuqurlashtirishga, mamlakatining eksport salohiyatini kuchaytirishga, yangi bozorlarni o‘zlashtirishga, to‘qimachilik mahsulotlari savdosini xalqaro ko‘lamda yangi bosqichga olib chiqishga, shuningdek, energiya tejovchi texnologiyalarni va qayta tiklanuvchi energiya manbalarini joriy etish borasidagi hamkorlikni yanada kengaytirishga xizmat qiladi.
O‘zbekiston Qayta tiklanuvchi energiya bo‘yicha Xalqaro Agentlik ustavini 2009 yilning 22 iyunida imzolagandi.
Ma'lumot o‘rnida shuni aytish kerakki, bugungi kunda dunyoning 100dan ziyod mamlakati Xalqaro tiklanuvchi energiya agentligi a'zosi sanaladi. Agentlik ushbu davlatlarning energetik salohiyatini oshirish, tiklanuvchan energiya manbalari va texnologiyalarni rivojlantirishga ko‘maklashib kelmoqda.
IRENA o‘z faoliyatini barqaror rivojlanishni ta'minlash maqsadida tiklanuvchi energiya resurslarining barcha turlarini ommalashtirishga, xususan, bioenergiya, gidroenergiya, quyosh va shamol energiyasidan foydalanishni kengaytirish, energetik xavfsizlikni kuchaytirishga qaratgan. Agentlik, shuningdek, xalqaro hamkorlik aloqalarini rivojlantirish, tajriba almashish uchun ham asosiy platforma sanaladi.
