Angliyaning «Chelsi» klubi «Real» hujumchisi Krishtianu Ronaldu atrofidagi vaziyatni diqqat bilan kuzatib bormoqda.
Daily Express tarqatgan xabarga ko‘ra, London jamoasi Madridni tark etish istagini bildirgan portugaliyalik ushbu futbolchini tarkibga qo‘shib olish uchun «Real»ga almashuv taklif etadi: Roman Abramovich ancha vaqtdan buyon «Real» qiziqib kelayotgan Eden Azarni berib, Krishtianu Ronalduni olmoqchi.
Ronalduga ayni vaqtda asosiy da'vogar «Manchester Yunayted» bo‘lib turibdi. Bu jamoa Ronaldu va Morata uchun darvozaboni David de Xeaga qo‘shib, 210 million yevro bermoqchi.
Yana bir da'vogar «PSJ» esa futbolchi uchun klubga 140 million yevro to‘lab, uning o‘ziga 30 million yevrolik yillik maosh tayinlashga tayyor.
Shuningdek, ushbu 32 yoshli futbolchiga «Manchester Siti», «Monako» va Xitoydagi klublardan takliflar bor.
