Respublika bojxonachilari tomonidan sifati kafolatlanmagan va tegishli hujjatlari mavjud bo‘lmagan uyali aloqa vositalarining bojxona nazoratidan yashirincha, noqonuniy yo‘llar bilan olib kirilishiga qarshi chora-tadbirlar davom ettirilmoqda, deb xabar berdi Davlat bojxona qo‘mitasi axborot xizmati.
Xususan, “Toshkent-Aero” ixtisoslashtirilgan bojxona kompleksi xodimlari poytaxt aeroportida Seuldan uchib kelgan fuqaro I.Hakimovning qing‘irliklarini fosh qilishdi. Unga tegishli bagaj belgilangan tartibda bojxona ko‘rigidan o‘tkazilganda, yuklar orasidagi maishiy texnika buyumlarining tasviri nazorat-rentgen apparati ekranida shubhali aks etdi. Shundan so‘ng, ushbu apparaturalar xolislar ishtirokida ochib ko‘rilganda, ularning orasiga qiymati 3,7 mln. so‘mlik 45 dona uyali telefonlar hamda ular uchun mo‘ljallangan 32 dona batareyka mohirlik bilan yashirilgani fosh bo‘ldi.
Farg‘ona tumanining qo‘shni davlat bilan chegaradosh hududida harakatlanayotgan notanish shaxs huquqni muhofaza qiluvchi idoralar vakillarini ko‘rib qolgach, yonidagi yuklarini tashlab juftakni rostlab qoladi. Bu esa bejiz emas ekan. Qoldirilgan yuklar o‘rnatilgan tartibda va xolislar ishtirokida ko‘zdan kechirilganda, ushbu shaxs qiymati 66 mln. so‘mdan ortiq bo‘lgan, xorijda ishlab chiqarilgan 70 dona mobil telefonlar hamda 40 dona televizion-tyunerlarini yashirincha olib kirishga uringani ma'lum bo‘ldi.
Toshkent viloyati bojxonachilari tomonidan ham shu turdagi bir nechta qonunbuzarlik holatlari fosh qilindi.
Xususan, “G‘ishtko‘prik” chegara-bojxona kompleksida piyoda ravishda mamlakatga kirib kelgan fuqarolar S.Sultonaliyev, X.Mahmudov va E.Mahmudovlar bojxonachilarni chalg‘itishga urinib, kiyimlari ostidan bellariga bog‘lagancha, 165 ta muqaddam foydalanilgan qo‘l telefonlarini olib kirishga urinishgan paytda to‘xtatib qolindi.
Mazkur kompleksda bojxona xodimlarining og‘zaki so‘rovi paytida va yo‘lovchi bojxona deklaratsiyasida ma'lum qilmasdan turib, uyali aloqa vositalarini olib kirishga uringan shaxslardan yana biri fuqaro Sh.Suhrobovadir. Ushbu ayol ham qiymati 7,5 mln. so‘mlik 3 turdagi 16 dona mobil telefonlarni ichki kiyimlariga yashirgancha olib kirayotgan paytda fosh qilindi.
Toshkent shahar bojxona boshqarmasi “Boshpochtamt” tashqi iqtisodiy faoliyat bojxona postida esa nano texnologiyalar asosida ishlab chiqilgan so‘nggi avlod uyali aloqa vositalarining pochta jo‘natmalari orqali noqonuniy ravishda olib kirilishiga chek qo‘yildi.
Xitoydan Farg‘ona viloyatida istiqomat qiluvchi fuqaro T.Amirxonov nomiga yuborilgan pochta jo‘natmasi bojxona ko‘rigidan o‘tkazilganda, unda deklaratsiyada boshqa nom bilan qayd etilgan, aslida valyuta plastik kartochkasi ko‘rinishida ishlab chiqilgan 10 dona Kardfon hamda 10 dona jajji quloqchinlar borligi aniqlandi.
Xitoydan poytaxtda istiqomat qiluvchi F.Kenjayeva nomiga keltirilgan yana bir pochta jo‘natmasida esa deklaratsiyada qayd etilmagan 5 dona “VM50” rusumli kichik hajmdagi mobil telefonlar yuborilganligi ma'lum bo‘ldi.
Bunday ixcham va mo‘'jaz telefonlarning yilning ayni shu paytida noqonuniy ravishda olib kirishga urinishlar bejiz emas. Tahlillarga ko‘ra, ushbu aloqa qurilmalaridan 1 avgust – respublikadagi oliy ta'lim muassasalarida bo‘lib o‘tgan davlat test imtihonlari jarayonida noqonuniy ravishda foydalanish ko‘zda tutilgan ekan.
Hozirda mazkur holatlar yuzasidan bojxona tekshiruvlari va surishtiruv jarayonlari davom ettirilmoqda.
