JCh–2018 turniriga saralash bosqichi so‘nggi – 10-turidan o‘rin olgan O‘zbekiston – Janubiy Koreya (0:0) uchrashuvidan keyin Shin Te Yong matbuot anjumanida ishtirok etdi.
“Biz g‘alaba uchun kelgandik, ammo durang qayd etdik. Ushbu natija bizni qatorasiga 9-marta JChga olib chiqdi. Futbolchilar o‘yin yakuniga qadar borini berib o‘ynadi, hatto o‘yindan bir kun oldin uxlay ham olmadi. O‘zbekistonlik muxlislar bizni muvaffaqiyat bilan tabrikladi, ularga rahmat aytaman.
Yuqorida aytganimdek, biz g‘alaba uchun kelgandik, ammo katta bosim tufayli gol ura olmadik. Shunga qaramay, bugungi natija bizni qoniqtiradi. O‘zbekiston terma jamoasi futbolchilari ham yaxshi o‘ynadi, ular Fair Play (halol o‘yin) qoidalariga amal qilib o‘ynadi.
Terma jamoaga kelganimga ko‘p bo‘lmadi. Birinchi o‘yinimni Eronga qarshi o‘ynadim. O‘zingiz bilasiz, Eron Osiyoning eng kuchli jamoasi. Shuning uchun biz hujumkor o‘ynashga harakat qildik. Bugungi o‘yin ham qiyin kechdi va yakunda qoniqarli natijaga ega bo‘ldik.
Birinchi bo‘limda yutqazmaslik uchun o‘ynagandik, chunki O‘zbekiston kuchli raqib ekanini bilardik. Raqib birinchi bo‘limda ikkinchisiga nisbatan kuchsizroq o‘ynadi. Ikkinchi bo‘limda O‘zbekiston futbolchilari jismoniy jihatdan sustlashganini sezdim”, – dedi koreyalik mutaxassis.
