Qibray tumanida yashovchi, nafaqaxo‘r, 1951 yilda tug‘ilgan Raisa Marinina (keltirilgan ism-familiyalar o‘zgartirilgan) ariza bilan murojaat qilib, o‘z arizasida noma'lum shaxs, deraza oynasi ochiqligidan foydalanib kirib, unga tegishli Qibray tumani hududida joylashgan bog‘dorchilik-uzumchilik shirkatidagi dala hovlisidan umumiy narxi taxminan bir million olti yuz ming so‘m bo‘lgan “Nokiya” rusumli uyali aloqa telefoni, tyuner, ayollar qo‘l soati va boshqa anjomlarini o‘g‘irlaganligini ma'lum qilgan.
Bu haqda Toshkent viloyati Ichki ishlar boshqarmasi axborot xizmati xabar bermoqda.
Olib borilgan tezkor chora-tadbirlar natijasida ushbu jinoyatni Toshkent shahrida yashovchi, voyaga yetmagan, 2001 yilda tug‘ilgan Rashid Dovurov sodir etganligi aniqlanib, ushlandi. Ushbu holat yuzasidan O‘zbekiston Respublikasi Jinoyat Kodeksining 169-moddasi 2-qismi (o‘g‘irlik) bilan jinoyat ishi qo‘zg‘atildi. Tergovni IIB olib bormoqda.
