19:50 / 03.01.2018
13984

Foto: Eronda namoyishchilarga qarshi namoyishlar bo‘lib o‘tdi

Eronda boshlangan norozilik namoyishlarining oltinchi kunida hukumat tarafdorlari ham ko‘chalarga chiqishdi.

Bugun, 3 yanvar kuni minglab hozirgi hukumat tarafdori bo‘lgan eronliklar davlat bayroqlari va oyatulloh Ali Xomanaiyning portretlarini ko‘targan holda marsh uyushtirishgan.

Davlat televideniyesida xabar berilishicha, Qum shahrida ko‘chalarga chiqqan namoyishchilar «Amerikaliklarning yollanma askarlariga o‘lim!» deya hayqirishgan.

Foto: AFP

Eronning uchinchi yirik shahri bo‘lmish Isfahonda, shuningdek, mamlakatning shimoli-g‘arbida joylashgan Abadan va Xurramshahr shaharlarida ham norozilik namoyishlariga qarshi tinch namoyishlar o‘tkazildi.

Foto: AFP

Namoyishga chiqqanlar tilidan shuningdek, «Tomirlarimizdagi qon rahbarimizga tortiq bo‘lsin!», «Biz o‘z yetakchimizni yolg‘iz qoldirmaymiz!» kabi shiorlar yangragan. Ular mamlakatda keyingi kunlarda o‘tkazilgan namoyishlarda AQSh, Buyuk Britaniya va Isroilni ayblashgan hamda «bu g‘alayonchilarni qatl qilish»ga chaqirishgan.

Foto: AFP
Foto: Sinxua

29 dekabr kuni Eronning Mashhad shahrida mamlakatdagi iqtisodiy qiyinchiliklarga qarshi boshlangan norozilik aksiyalari keyingi kunlarda mamlakatning boshqa yirik shaharlariga tarqaldi. O‘tgan vaqt davomida bo‘lib o‘tgan to‘qnashuvlar natijasida 20dan ortiq kishi halok bo‘ldi, yuzlab kishilar hibsga olindi.

Mavzu
Eronda g‘alayonlar to‘lqini

29 dekabr kuni Eronning turli shaharlarida inflatsiya, rahbariyat va katta xarajatlar talab qilayotgan tashqi siyosatga qarshi namoyishlar to‘lqini boshlandi.

Barchasi
Top