Fotoreportaj: Andijonda Vatan himoyachilari kuniga bag‘ishlangan harbiy parad va tantanalar o‘tkazildi

Andijonda O‘zbekiston Respublikasi Qurolli Kuchlari tashkil etilganining 26 yilligi va 14 yanvar – Vatan himoyachilari kuni har yilgidan farqli ravishda ko‘tarinki ruhda nishonlanmoqda.

Bugun erta tongda viloyat hokimligi va keng jamoatchilik vakillari Xotira xiyobonidagi haykal poyiga guldastalar qo‘ydilar.

So‘ng bayram tantanalari viloyat markazidagi Navoiy shohko‘chasida boshlandi. Minglab kishilar qo‘llarida yurt bayrog‘i bilan harbiy parad va askarlarning chiqishlarini tomosha qildilar. Shuni alohida ta'kidlash lozimki, bayram tom ma'noda xalq sayliga aylanib ketdi. Maydonda orkestr sadolari ostida Qurolli kuchlarimiz vakillari o‘z salohiyatini namoyish qildilar.

Bobur nomli viloyat musiqali drama teatrida bo‘lib o‘tgan tantanada harbiylar sharaflanib, ularga mukofotlar va avtomashinalar kaliti topshirildi. Viloyat san'at ustalari tomonidan teatrlashtirilgan konsert dasturi namoyish qilindi.