Aripov Tojikistonga boradi. Kun tartibida elektr energiyasi importi va gaz eksporti 

Tojikiston hukumatidan «Aziya-Plyus»ga xabar berishlaricha, o‘tgan yil oxirida bo‘lib o‘tishi kerak bo‘lgan komissiya yig‘ilishi «o‘sha paytda Toshkent va Dushanbe o‘rtasida hal qilinmagan munozarali masalalar bo‘lmagani, ammo ikki davlatning munosabatlari barcha yo‘nalishlar hamda sohalarda izchil rivojlangani» sababli boshqa muddatga ko‘chirilgandi.

Bo‘lajak yig‘ilishda asosan Tojikiston va O‘zbekiston o‘rtasidagi savdo-iqtisodiy, gumanitar, madaniy va ilmiy-texnikaviy hamkorlikni rivojlantirish masalalari muhokama qilinadi.

Ushbu uchrashuvda Tojikistonning O‘zbekistonga elektr energiyasi yetkazib berish hajmi, O‘zbekistondan Tojikistonga yetkazib beriladigan tabiiy gaz hajmi va ularning joriy yildagi narxlari masalasi kelishib olinadi.

O‘tgan yili Tojikistondan O‘zbekistonga 1 milliard 425,1 million kVt/s elektr energiyasi har bir kilovatt uchun 2 sent narxida yetkazib berildi. Tojikistondan O‘zbekistonga elektr energiyasi eksport qilishning umumiy hajmi 28,5 million dollarni tashkil etdi.

2019 yilda Tojikiston O‘zbekistondan 17,7 million dollar miqdorida 140 million kubometr tabiiy gaz sotib oldi, o‘tgan yili Tojikiston o‘zbek gazini har ming kub metr uchun 120 dollar narxida oldi.