Путинга талабини юмшатган Трамп, Ғазони назоратга олишни маъқуллаган Исроил ва «Вагнер»ни «Африка корпуси» билан алмаштирадиган Россия - кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

{Yii::t(}

Ўтказиб юбориш 6s

Ўтказиб юбориш

Трамп энди Путиндан Зеленский билан учрашишни талаб қилмаяпти

АҚШ президенти Доналд Трамп, агар Украина етакчиси Володимир Зеленский билан учрашмаса ҳам, Россия етакчиси Владимир Путин билан саммитга тайёр эканини айтди. Оқ уй ҳали ҳам тафсилотларни ишлаб чиқмоқда, деди 7 август, пайшанба куни матбуот котиби Кэролайн Ливитт.

Трампнинг изоҳи Путиннинг келаси ҳафта, эҳтимол Бирлашган Араб Амирликларида АҚШ етакчиси билан шахсан суҳбатлашишга умид қилаётгани ҳақидаги сўзлари ортидан берилди, деб эслатади AP агентлиги.

Журналистнинг Путиннинг Зеленский билан учрашуви Россия етакчисининг Трамп билан музокаралари учун шарт бўлиши керакми, деган саволига у шундай жавоб берди: «Йўқ, унга (Путин) бунинг учун Украина раҳбари билан учрашиш керак эмас. Йўқ».

Оқ уй матбуот котиби 7 август куни аввалроқ AP агентлигига Путин Зеленский билан шахсан учрашишга рози бўлмаса, АҚШ-Россия саммити бўлиб ўтмаслигини айтди, бироқ кейинроқ бундай сценарий саммит эҳтимолини камайтиради, деб аниқлик киритди.

Исроилда Ғазо шаҳрини назорат остига олиш маъқулланди

Исроил хавфсизлик маҳкамаси Фаластиннинг ҲАМАС ҳаракатини «мағлубиятга учратиш» ва Ғазо шаҳри устидан назорат ўрнатиш режасини маъқуллади. Бу ҳақда 8 август, жума куни AP ва Reuters агентлиги хабар берди. Бу қарор исроиллик юқори мартабали амалдорларнинг тунги учрашувидан сўнг — урушни тўхтатишга қаратилган халқаро чақириқлар кучайиб бораётганига ва ҲАМАС томонидан гаровга олинганлар тақдиридан қўрққан кўплаб исроилликларнинг норозиликларига қарамай қабул қилинди.

Бош вазир Бинямин Нетаняҳу аввалроқ Fox News телеканалига берган интервюсида бир қатор режалар ҳақида гапириб, Исроил бутун Ғазо секторини назорат қилишни режалаштираётганини айтган эди. Исроил армияси аллақачон эксклавнинг тўртдан уч қисмини назорат қилмоқда.

Исроил мудофаа кучлари (ЦАҲАЛ) Ғазо шаҳрига бир неча бор ҳаво ҳужумлари ва рейдлар уюштирди. Бироқ, бу эксклавнинг Исроил буфер зонасига айлантирилмаган ва эвакуация қилинмаган кам сонли ҳудудларидан биридир.

Ҳудудда қуруқликдаги йирик операция ўн минглаб одамларни кўчириши ва озиқ-овқат етказиб беришга тўсқинлик қилиши мумкин, дея қайд этди AP.

Россия «Вагнер»ни «Африка корпуси» билан алмаштирмоқчи

2023 йилда Евгений Пригожин вафотидан кейин Россия Марказий Африка Республикаси (МАР)даги "Вагнер" хусусий ҳарбий компаниясини Россия Мудофаа вазирлиги назорати остидаги «Африка корпуси» билан алмаштиришга ва иш учун тўловни минерал ресурсларда эмас, балки нақд пулда олишни бошлашга ҳаракат қилмоқда. Бу ҳақда AP агентлиги хабар берди. 7 август, пайшанба куни AFP хабарига кўра, сўнгги пайтларда МАРда хавфсизлик билан боғлиқ вазият бироз яхшиланган.

Хусусий ҳарбий компания МАР президенти Фостена-Арканжа Туадера ва унинг ҳукуматини қўриқлайди. Бунинг эвазига у олтиндан фойдаланиш имконига эга бўлди.

МАР ҳарбий мулозимининг AP агентлигига айтишича, Россия мудофаа вазири ўринбосари шу йил бошида мамлакатга бир қатор ташрифлар чоғида "Вагнер гуруҳи" ўрнига "Африка корпуси"дан фойдаланиш ва унинг хизматлари учун ҳақ тўлаш талабларини қўйган.

Юнус-Бек Евкуров, жумладан, март ойида МАРга ташриф буюрган.

Трамп: Пашинян ва Алиев 8 август куни тинчлик битимини имзолайди

АҚШ президенти Доналд Трамп Озарбойжон раҳбари Илҳом Алиев ва Арманистон бош вазири Никол Пашинянни 8 август куни икки давлат ўртасидаги узоқ йиллик можарога барҳам беришга қаратилган «тарихий тинчлик саммити» доирасида қабул қилишини тасдиқлади. Америка етакчиси тегишли хабарни 7 август, пайшанба куни Truth Social ижтимоий тармоғида жойлаштирди.

Пашинян ва Алиев «тинчлик келишувини расмий имзолаш маросимида Оқ уйда мен билан бирга бўлади», деб ёзган Трамп.

Унинг сўзларига кўра, Вашингтон, шунингдек, Жанубий Кавказ салоҳиятини очишга ёрдам берадиган «иктисодий имкониятларни бўлишиш бўйича икки давлат билан» икки томонлама келишувларни ҳам имзолайди.

«Кўплаб етакчилар урушни тугатишга уриниб кўрди, аммо ҳозиргача муваффақиятсизликка учради — «ТРАМП туфайли (ўзгариш бор)», — деб ёзди у.

«Менинг маъмуриятим анча вақтдан бери ҳар икки томон билан музокаралар олиб бормоқда», — дея қўшимча қилди АҚШ президенти ва у «тўғри иш қилгани учун бу жасур раҳбарлар билан жуда фахрланишини» таъкидлади.

Украиналиклар Россия-Гуржистон чегарасида очлик эълон қилди

Россиядан чиқариб юборилганидан кейин Гуржистон билан чегарада қолиб кетган камида 15 нафар Украина фуқароси очлик эълон қилди. Улар Гуржистон божхона хизмати раҳбарига тегишли баёнотни тақдим этди, деб хабар берди «Новая газета Европа» манбаларига таяниб.

Украиналиклар Украина консулидан ўзлари жойлашган Гуржистон чегарасидаги «Юқори Ларс — Даряли» назорат-ўтказиш пунктининг буфер зонасига келишини талаб қилмоқда. Шунингдек, улар тиббий ёрдам, қўлга олинганлик сабаблари ва ҳуқуқий мақоми, Украинага ўтиш ва Россияга қайтмаслик кафолатлари ҳамда ўзлари сақланаётган ертўладан озод этилишини сўрамоқда.

Очлик эълон қилиш ҳақидаги баёнот Украинанинг Гуржистондаги элчихонасига, Гуржистон омбудсмани идорасига, Гуржистон Бош прокуратурасига, Amnesty International ва Human Rights Watch инсон ҳуқуқлари ташкилотлари ҳамда БМТнинг Гуржистондаги қочқинлар ишлари бўйича агентлигига ҳам юборилган.

«Даряли» Россиядан чиқариб юборилган украиналиклар мамлакатни тарк этиши мумкин бўлган ягона чегара пунктидир. 5 июндан буён 100 га яқин украиналиклар, асосан эркаклар деразасиз, тор ертўлада, кўпчилиги ҳужжатсиз ушлаб турилибди. Улардан баъзилари жазо муддатини ўтаб, Россиядан депортация қилинган собиқ маҳбуслар, баъзилари эса Россиянинг Украинага бостириб киришига қарши чиққан тинч фуқаролардир.