Samsung халқаро аэропортларда Galaxy Note 7 алмаштириш пунктларини очади

Жанубий Кореянинг Samsung компанияси аэропортларда Galaxy Note 7 смартфонларини алмаштириш пунктларини ташкил этмоқда, деб хабар қилган The Verge. Шу йўл билан ишлаб чиқарувчи йўловчиларни сўнгги паллада хавфли телефонларидан халос қилмоқчи. 

Биринчи шундай хизмат кўрсатиш Корея республикаси аэропортларида йўлга қўйилган, деб ёзади нашр. 

Samsung шунингдек, шу каби алмаштириш нуқталари Австралияда ҳам очилишини расман тасдиқлади. АҚШда ҳам шу каби хизмат таклиф этилиши ҳақида хабарлар бор. 

Бу пунктлар назорат ҳудудлари олдида жойлаштирилади. Фойдаланувчиларга смартфонни айнан қандай моделга алмаштириш таклиф этилаётганига ойдинлик киритилмаган. 

Таҳлилчиларнинг фикрича, Galaxy Note 7 смартфони қайтариб олингани ва ишлаб чиқаришдан тўхтатилганига қарамай, яна 1 млндан ортиқ шу моделдаги смартфон фойдаланишда. 

Аввалроқ, АҚШ ва Японияда Samsung Galaxy Note 7 телефонларини самолётларга олиб чиқиш тақиқлангани хабар қилинган эди.