Ўзбекистонда Маънавият ва маърифат маркази томонидан тарғибот тадбирлари ўтказилмоқда

Республика Маънавият ва маърифат маркази томонидан Ўзбекистон Республикаси Президенти Шавкат Мирзиёевнинг ижод аҳли ва зиёлилар билан учрашувида кўтарилган масалаларни муҳокама қилиш, шу билан бирга давлат мустақиллигининг йигирма олти йиллик байрамига тайёргарлик кўриш мақсадида марказининг профессор-ўқитувчилар, ёзувчи ва шоирлар, рассомлар, театр актёри ва актрисалари ҳамда санъаткорлардан иборат тарғибот гуруҳи мамлакатнинг турли ҳудудларида учрашувлар олиб бормоқда.

Мазкур тарғибот гуруҳлари Ўзбекистон Республикаси давлат мустақиллигининг йигирма олти йиллик байрамининг мазмун-моҳиятини аҳоли ўртасида кенг ёритиш мақсадида “Фидойинг бўлгаймиз сени, Ўзбекистон!” мавзусида тарғибот тадбирларида иштирок этишмоқда.  

Тарғиботчилар томонидан Қорақалпоғистон Республикаси, вилоятлар ва Тошкент шаҳридаги барча маҳалла гузарларида, меҳрибонлик уйларида, болалар оромгоҳида шунингдек бошқа меҳнат жамоларида аҳолининг кенг қатлами вакиллари, айниқса чекка-чекка ҳудудларда уюшмаган аҳоли вакиллари иштирокида, “Фидойинг бўлгаймиз сени, Ўзбекистон!”, “Ўзбекистон жаннатмакон юрт”, “Мустақиллигимиз абадий бўлсин!”, “Энг шонли, энг улуғ ва муқаддас байрамимиз” шиорлари остида тадбирлар ўтказилмоқда.

Тарғиботчилар томонидан ўтказилаётган тадбирларда мамлакатда маънавият ва маърифатга бўлган муносабатни тубдан ўзгартириш, юртимизда бунёдкорлик руҳини яратиш, мустақилликнинг маънавий-маърифий асосларини кенг ёритиш алоҳида эътибор қаратилмоқда. 

Ўтказилаётган мазкур тадбирларда аҳолининг кенг қатлам вакиллари, жойлардаги ижодкор ва зиёлилар, нуронийлар, маҳалла фаоллари, маҳалла ёшлари ҳамда кенг жамоатчилик вакиллари иштироки таъминланмоқда.

Бугунги кунгача Республика Маънавият ва маърифат марказининг тарғибот гуруҳи томонидан Қорақалпоғистон Республикасининг Тўрткўл, Тахтакўпир ва Қонликўл туманларида, Қашқадарё вилоятининг Китоб, Қарши туманлари ва Бешкент шаҳарчасида, Навоий вилоятининг Навоий шаҳри, Навбаҳор ва Қизилтепа туманлари, Тошкент вилоятининг Бўстонлиқ ва Зангиота туманларида тадбирлар ўтказилди. Тарғибот гуруҳлари томонидан мамлакатнинг энг чекка ҳудудларигача қамраб олишни мақсад қилинган тарғибот тадбирлари давом эттирилмоқда.