Буюк Британияда 20 миллион долларлик автомобиль рақами сотувга қўйилди

Британиянинг Kahn Design тюнинг-ательеси раҳбари Афзал Кан «F1» автомобиль рақамини 14,4 миллион фунт стерлинг (20 миллион долларга яқин)га сотувга қўйди. Сотув ҳақидаги эълон RegTransfers сайтига жойланган.

Кан бу рақамни 2008 йилда 440 минг фунт стерлингга харид қилган. Ўшанда рақам Эссекс графлик кенгашига тегишли бўлган ва унинг раиси бошқарадиган Volvo S80 машинасига ўрнатилган бўлган. «F1» рақами Буюк Британияда 109 йилдан буён қўлланилади - айнан ўшанда шундай рақамли илк автомобиль рўйхатдан ўтказилган.

Ҳозир Кан «F1» рақамини Bugatti Veyron Super Sport Carbon Edition гиперкарига ўрнатган. 2014 йилда ишбилармон бу рақамни 8,5 миллион фунтга сотиш таклифини рад этган эди. 

Бугунги кунда Буюк Британия рекорди «25 О» давлат рақамига тегишли - бу рақамни 2014 йилда 518 480 фунт стерлингга сотиб олишган. У Ferrari 250 GT SWB классик спорткарига ўрнатилган.