Давлат мукофотларидан қандай ҳолларда маҳрум этишади?

"Давлат мукофотлари тўғрисида”ги қонуннинг янги таҳрири эълон қилинди.

Қонун билан давлат мукофотлари билан тақдирланган шахслар қандай ҳолларда улардан маҳрум этилиши мумкин экани белгилаб қўйилди:

шахс оғир ёки ўта оғир жиноят содир этганлиги учун ҳукм қилинганда — суднинг тақдимномасига биноан; 

шахс ўз шаъни ва қадр-қимматини бадном этувчи хатти-ҳаракат содир этганда — тақдирлаш тўғрисида тақдимнома киритиш ҳуқуқига эга бўлган орган ёки ташкилотнинг тақдимномасига биноан.

Давлат мукофотларидан маҳрум этиш Ўзбекистон Республикаси Президенти томонидан амалга оширилади.

Давлат мукофотларидан маҳрум бўлганлик белгиланган имтиёзлар бекор қилинишига сабаб бўлади.

Давлат мукофотидан маҳрум этилган шахсга тегишли давлат мукофоти ва унга доир гувоҳнома Ўзбекистон Республикаси Президенти ҳузуридаги Давлат мукофотлари ва геральдика бўйича комиссияга қайтарилиши лозим.
Қонунга зид равишда ҳукм қилинган ва тўлиқ оқланган шахсларнинг давлат мукофотларига бўлган ҳуқуқлари қонун ҳужжатларига мувофиқ тикланади.

Орденни, медални, фахрий унвонга доир кўкрак нишонини қонунга зид равишда тақиб юриш, сотиб олиш, сотиш, алмашиш ёки ўзга тарзда ҳақ эвазига бериш белгиланган тартибда жавобгарликка сабаб бўлади.

Ташқи кўриниши давлат мукофотларига ўхшаш бўлган эсдалик ва кўкрак нишонларини, идоравий ёки бошқа мукофотларни таъсис этиш ҳамда тайёрлаш тақиқланади.

Ҳуқуқни муҳофаза қилувчи органлар қонун ҳужжатларида белгиланган тартибда олиб қўйган Ўзбекистон Республикаси давлат мукофотлари, шунингдек эгаси аниқланмаган давлат мукофотлари Ўзбекистон Республикаси Президенти ҳузуридаги Давлат мукофотлари ва геральдика бўйича комиссияга топширилади.