“Асад бизникидан кўра, кўпроқ сизнинг йигитдир” – Мария Захарова Башар Асад ҳақида

Россия ташқи ишлар вазирлигининг расмий вакили Мария Захарова Суриядаги кимёвий қуролсизлантириш бошлангунча президент Башар Асад “Москванинг эмас, Лондон ва Вашингтоннинг энг яхши дўсти” бўлганини эслатиб ўтди.

“Суриядаги кимёвий қуролсизлантириш бошлангунча Асад Москванинг эмас, Лондон ва Вашингтоннинг энг яхши дўсти бўлган. Керри (АҚШнинг собиқ давлат котиби Жон Керри) сенатда ишлаганда, Асад билан дўстона муносабатларда бўлган”, деб айтган Захарова Британиянинг Sky News телеканалига берган интервьюсида.

“Асад ҳаётининг катта қисмини Британияда ўтказган. У бизникидан кўра, кўпроқ сизнинг йигитдир”, деб қўшимча қилган Захарова.

Ғарб давлатлари ўтган ҳафта охиридан расмий Дамашқни Дума шаҳрига кимёвий ҳужум содир этишда айблаб келмоқда. 

Дамашқ 2013 йилдаги келишув доирасида 1,3 минг тонна кимёвий модда ва кимёвий қуролни яратишда қўлланадиган прекурсорларни ҳамда 1,2 минг зарядланмаган ўқ дориларини йўқ қилганини декларация қилган. Кимёвий қуролни тақиқлаш ташкилоти 2016 йил январда Сурияда кимёвий қуролнинг тўлиқ йўқ қилинганини эълон қилганди.