Тўсун мухлисларга ўлим билан таҳдид қилгани учун майдондан четлатилди

Туркия терма жамоаси ҳужумчиси Женк Тўсун Тунисга (2:2) қарши ўртоқлик ўйинида майдондан четлатилди. 

Футболчи мухлисларга қарата бармоғини томоғидан ўтказиб, ўлим ишорасини қилгани учун ҳакам томонидан қизил картага лойиқ кўрилди, деб хабар беради Daily Mail.

Швейцариянинг Каруж шаҳрида бошланган ўйин нотинч ўтди. Туркиядан келган мухлислар шовқин-сурон солиб, пиротехника воситаларидан фойдалана бошладилар. Улар улоқтирган файерлардан бири Тўсуннинг отаси ва амакиси ўтирган жойга тушди. Бундан дарғазаб бўлган футболчи мухлислар билан орани очиқ қилишга уринди, аммо, жамоадошлари уни тўхтатиб қолишди. Шунда ҳам, Тўсун ўзини босиб ололмади ва мухлисларга қарата бармоғини томоғидан ўтказиб, ўлим ишорасини қилди. Шундан сўнг, вазиятни кузатиб турган бош ҳакам Федайи Сан зудлик билан уни майдондан четлатди.

Муаммолар шу билан тугамади. Ўйиндан сўнг, мухлислар майдонга ёпирилишди, футболчилар эса майдонни зўрға тарк этишга улгуришди.

Эслатиб ўтамиз, Туркия ЖЧ-2018 йўлланмасини қўлга киритолмаган. Тунис эса мундиал гуруҳ босқичида Англия (18 июнь), Бельгия (23 июнь) ва Панама (28 июнь) билан беллашади.