Россияда ўзбекистонлик ишчилар норозилик акцияси уюштирди

Россиянинг Тюмень области Тобольск шаҳрида норозилик акцияси уюштирган ўзбекистонликларнинг иш берувчиси ҳисобланган 6 ташкилот жавобгарликка тортилди. Бу ҳақда Ura.ru хабар қилмоқда.

Тюмень области прокуратураси «Сибур» объекти ҳисобланган «ЗапСибНефтехим» қурилиш участкасидаги тартибсизликлар билан боғлиқ вазиятни текширувдан ўтказди.

Гап Москва фирмаларининг субпудратчилари «День-Строй», «Источ-Констракшн», «Элай-Строй», пудратчи «Ренейссанс Хэви Индастрис», юқорида кўрсатилган «ЗапСибНефтехим» ва «ТрансАвто» ҳақида кетмоқда.

Ўзбекистонлик ишчилар каскаларини ечиб, асфальтга ўтириб олган ва раҳбариятдан рўй берган бузилишлар тўғрисида ҳисобот беришни талаб қилган.

Ўзбекистонликларга иккита маошнинг ўрнига битта иш ҳақи тўланган, тиббий ёрдам кўрсатиш бўйича ишлар кечиктирилган, етарлича автобус тақдим этилмаган, натижада бу ноқулай меҳнат шароитлари, соғлиқ билан боғлиқ муаммолар, кеч келганлик учун жарималарга олиб келган.

Шунингдек, акция ташаббускорларига танбеҳ берган тожикистонлик ва рўй бераётган ҳолатни телефонга олган қирғизистонлик ишчи билан муштлашув юз берган.

Норозилик акциясида 300га яқин киши иштирок этган. Тергов давом этмоқда.