Умид Аҳмаджонов: «Ишонтириб айтаманки, Токио Олимпиадасида янги номларни кўрасиз»

Ўзбекистон Миллий олимпия қўмитаси президенти Умид Аҳмаджонов Индонезияда ўтган Осиё ўйинларида иштирок этган фахрий спортчилар, хусусан Антон Фокин, Вадим Меньков ва Оксана Чусовитина ҳақида фикр билдириб, уларнинг Токио-2020 Олимпиадасида ҳам иштирок этишлари учун шароитлар яратиб берилишини таъкидлади.

«Сиз санаб ўтган спортчиларнинг ҳар бири ўзбек спорти тарихида ўчмас из қолдирган ва биз буни юксак қадрлаймиз. Индонезияда биз тажриба ва ёшлик шижоатини уйғунлаштиришга ҳаракат қилдик ва буни уддалай олдик, деб ўйлайман.

Агар Токио 2020 Олимпия ўйинларига қадар ана шундай юксак спорт формасини ушлаб тура олишса, биз бу спортчиларимизнинг Олимпиадада иштирок этишлари учун барча керакли шароитларни яратиб беришга тайёрмиз.

Шу билан биргаликда, ушбу спортчиларимизни келажакда устозлик ролида кўриш истагимиз бор. Мақсадимиз уларни мураббийлик ишига жалб қилиб, улкан тажрибасидан фойдаланиш, ёш авлод тарбиясини уларга ишониб топшириш ва ўзларига ўхшаган ҳақиқий профессионал юлдузларни етиштириб беришларини таъминлашдан иборат», - деган Аҳмаджонов ЎзА`га берган интерьюсида.

«Захира масаласига келсак, сизни ишонтириб айтаманки, Токио Олимпиадасида бир неча янги номларни кўрасиз. Бу борада ҳозир катта ҳажмда иш олиб борилмоқда. 6 октябрь куни Буэнос-Айресда старт оладиган III ўсмирлар Олимпия ўйинлари ҳам кўп нарсага ойдинлик киритиб бериши керак», - дея қўшимча қилган МОҚ президенти.

Умид Аҳмаджонов Осиё ўйинларида қайси спорт турларидаги натижалар уни қониқтиргани, қайсилари хафсаласини пир қилгани ҳақида ҳам айтиб ўтган.

«Баъзи спорт турларида терма жамоамиз аъзолари кутилган натижаларни кўрсата олишмади. Масалан жиу-житсу, пенчак силат, ўқ отиш, сув спорти турлари, қиличбозлик, триатлон каби спорт турларидан ҳам медаллар кутгандик. Лекин қувонарлиси шундаки, ушбу кемтик жойларни олимпия спорт турларида вакилларимиз кўплаб медалларга эга чиқиб тўлдириб беришди.

Бокс, спорт курашлари, таэквондо WTF, байдарка ва каноэда эшкак эшиш, оғир атлетика, енгил атлетика, академик эшкак эшиш, теннис, каратэ, дзюдо, бадиий ва спорт гимнастикаси каби спорт турлари ана шулар жумласидандир. Албатта, улар қаторида миллий спортимиз кураш алоҳида эътирофга сазовор бўлди. Шунингдек, мусобақада самбочиларимиз ҳам барчамизни хурсанд қилишди», - деган Ўзбекистон спорти раҳбари.