Надаль тарихдаги энг яхши теннисчи кимлигини айтди

Жаҳоннинг биринчи ракеткаси испаниялик Рафаэль Надалнинг фикрича, швейцариялик Рожер Федерер тарихдаги энг яхши теннисчи саналади.

«Мен буни бошқалар айтганда ҳис қилмайман, чунки мен бу ҳақиқат эканлигига юз фоиз аминман. Бошқа ўйинчилар унинг натижаларини такрорлаши қийин бўлади. Лекин менимча, фақатгина «Катта дубулға» мусобақалари бўйича ўйинчининг натижаларини таҳлил қилиш унчалик тўғри эмас. Дунёда ҳамма биладики, теннис - бу фақат «Катта дубулға» эмас. Бошқа кўплаб нарсалар мавжуд.

Рожер бошқа мусобақаларда ҳам ажойиб натижаларга эришди. Лекин, албатта, «Катта дубулға» турнирларида энг кўп ютуқни у қўлга киритган.

Мен Род Лэйвер қандай ўйнаганини ҳеч қачон кўрмаганман, лекин унинг тарихини биламан. У «Катта дубулға» турнирларида бир неча йил давомида ўйнамади, чунки профессионалга айланди. У икки марта «Катта дубулға»нинг тўрттадан мусобақасида ғалаба қозонган. Шунинг учун, ҳозирги пайтда тарихдаги энг яхши ўйинчи ҳақидаги масала менга ва Рожерга эмас, балки Род Лэйвер ҳамда Рожерга тегишли. Лекин мен Род қандай ўйнаганини ҳеч қачон кўрмаганман.

Ўз фаолиятим ҳақида гапирар эканман, мен орзу қилган нарсалардан кўпроғига эришдим. Умид қиламанки, менда ғалаба қозонишни давом эттириш учун имкониятлар бўлади. Мен бунга ҳаракат қиламан. Менинг фаолиятим тугаганидан сўнг, теннис тарихидаги қандай ўринни эгаллашимни кўрамиз», - дея Надалнинг сўзларини келтиради Daily Express.