Монополияга қарши курашиш қўмитаси: «Гўшт бозорида хеч қандай монополия йўқ»

Монополияга қарши курашиш қўмитаси гўшт нархи билан боғлиқ вазиятга изоҳ берди. Қўмита гўшт нархи нега тартибга солинмаётганини ҳам маълум қилди.

Ўзбекистон Республикаси Статистика қўмитаси берган маълумотларга кўра, жорий йилнинг 1 апрель ҳолатига тирик вазнда гўшт ишлаб чиқариш ҳажмларини 94,3 фоизи деҳқон (шахсий ) хўжаликларига, 4,8 фоизи фермер хўжаликларига ва 0,9 фоизи қишлоқ хўжалик фаолияти билан шуғулланувчи корхоналар ҳиссасига тўғри келган.

Билдирилишича, гўшт бозорида ҳеч қандай монополия йўқ ва унда рақобат шаклланган. Шунингдек, бу ўз навбатида республикада гўшт бозорининг талаб ва таклифдан келиб чиқиб барқарор ишлаб чиқаришни таъминлайдиган саноат ишлаб чиқариш улуши жуда камлигини кўрсатади.

Ўзбекистон Республикаси Вазирлар Маҳкамасининг 2018 йил 30 мартдаги 249-сон қарори билан Нархлари (тарифлари) давлат томонидан тартибга солинадиган ижтимоий аҳамиятли товарлар (хизматлар) ва уларнинг стратегик турлари рўйхати тасдиқланган. Унга кўра, гўшт ушбу рўйхатга киритилмаган ва унинг нархи ишлаб чиқарувчи томонидан мустақил равишда белгиланади.

“Таъкидлаш жоизки, бугунги кунда Қўмита томонидан гўшт бозори ўрганилмоқда. Ўрганиш якуни бўйича Қўмита айнан шу соҳада тадбиркорлик фаолиятини янада ривожлантиришга қаратилган таклифлар ва чора-тадбирлар дастурини ишлаб чиқади”, - дейилади Монополияга қарши курашиш қўмитаси ахборот хизмати хабарида.