Энди электрон рақамли имзо сертификатини масофадан туриб олиш мумкин

Ушбу давлат хизматидан мурожаат этувчи ҳали электрон рақамли имзо сертификатига эга бўлмаган ҳолларда хам фойдаланиши мумкин

Давлат солиқ қўмитаси ва Давлат хизматлари агентлиги томонидан жисмоний ва юридик шахсларга электрон рақамли имзо калити ва сертификатини махсус ахборот ресурси орқали бериш механизми жорий қилинди.

ДСҚ хабарига кўра, бунда ушбу давлат хизматидан мурожаат этувчи ҳали электрон рақамли имзо сертификатига эга бўлмаган ҳолларда хам фойдаланиши мумкин.

Мурожаат этувчининг шахсини тасдиқлаш ва сўровномадаги маълумотлар тўғри тўлдирилганлигини текшириш Давлат хизматлари маркази оператори томонидан қуйидаги тартибда амалга оширилади:

сўровномада кўрсатилган мобил телефон рақами мурожаат этувчига тегишлилиги;

мурожаат этувчининг паспорт нусхаси ва селфи фото нусхаси орқали паспорт маълумотларининг тўғрилиги;

мурожаат этувчининг СТИР орқали ДСҚ ахборот тизимидаги маълумотларни сўровномадаги маълумотлар билан солиштириш орқали текширади.

Мурожаат этувчининг шахсини тасдиқлашда селфи фото жуда муҳим ҳисобланади. Бунда, илова қилинаётган фотосурат нусхада мурожаатчи юз қиёфаси “анфас” шаклда ва тиниқ кўринган ҳамда паспортнинг асосий саҳифаси барча символлари ўқиб бўладиган сифатда бўлиши шарт.

Акс ҳолда сертификатни беришни рад этиш тўғрисидаги хабарнома берилади. Мурожаат этувчи рад этиш сабабларини бартараф этгандан сўнг, такроран мурожаат этиши мумкин.