Хитой пойтахтида коронавирусга чалинган бирорта бемор қолмади

Хитой пойтахти Пекин шифохоналаридан коронавирусга чалинган охирги икки бемор чиқди. Пандемия бошидан бери биринчи марта Пекиннинг тиббиёт муассасаларида коронавирусга чалинган бирорта бемор қолмади. Бу ҳақда Пекиннинг гигиена ва соғлиқни сақлаш масалалари бўйича қўмитаси маълум қилди.

Фото: Reuters

Умуман олганда, Пекинда пандемия давомида коронавирус билан касалланган 935 нафар бемор қайд қилинган. Улардан 335 нафари июнда “Синфади” улгуржи бозорида коронавирус тарқалиши вақтида касалланган.

Ҳозирда Пекинда эпидемиологик назоратнинг енгиллаштирилган чоралари амал қилмоқда, кўчаларда ниқоб тақиш аввалгидек шарт эмас. Бироқ ниқобларсиз жамоат транспортида юриш, дўконлар, кинотеатрлар, давлат муассасаларига ташриф буюриш ҳамон тақиқланган.

Пандемия бошидан бери Хитойда коронавирусга чалинганлар сони 85 мингга етган, улардан 4,6 минг киши вафот этган. Ҳозирда Хитой шифохоналарида коронавирусга чалинган 347 нафар бемор қолмоқда.

Тайёрлаган Шуҳрат Раҳимов

#Пекин #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.