SpaceX’нинг интернети бир сонияда 100 мегабит тезликка чиқди

Компания вакилининг айтишича, ушбу босқичда сервис жуда паст кечикиш даражаси ва сониясига 100 мегабитдан юқори уланиш тезлигини намойиш этди. Унинг сўзларига кўра, кечикиш даражаси фойдаланувчиларга «энг динамик онлайн кўп иштирокчига эга ўйинларни» ўйнашга имкон берадиган даражада паст бўлган, юклаб олиш тезлиги эса бир нечта HD шаклдаги видеоларни оқимли узатиш, шунингдек, бошқа эҳтиёжлар учун канал ўтказувчанлигининг бир қисмини тежаш учун етарли бўлди.

Ҳозирда компания Starlink космик кемалари ўртасида сунъий йўлдошлараро уланишни синовдан ўтказмоқда, натижада лазер алоқаси ёрдамида бир жуфт сунъий йўлдош ўртасида 100 гигабайт маълумот узатилди. SpaceX’нинг билдиришича, ушбу технологиядан тўлиқ фойдаланиш Starlink’ни «дунё бўйлаб маълумотларни узатишнинг энг тезкор вариантларидан бири»га айлантиради.

Қайд этиш лозимки, 3 сентябрь куни Falcon-9 ракета ташувчиси навбатдаги Starlink интернет сунъий йўлдош гуруҳи билан Флоридадан учирилди. Ракета 60та сунъий йўлдош партиясини фазога олиб чиқди.

Ушбу парвоздан сўнг, орбитадаги Starlink қурилмалари сони 710дан ошади. Уларнинг сони 1500га етганида, SpaceX улардан фойдаланишни бошлашни режалаштирмоқда. Ҳаммаси бўлиб 42 мингга яқин сунъий йўлдошни учириш мўлжалланган.

Starlink - бу Ер аҳолисини интернетга кенг полосали уланиш билан таъминлашга қодир сунъий йўлдош тармоғи. Лойиҳа 2018 йил февраль ойида бошланган. SpaceX лойиҳа қийматини 10 миллиард долларга баҳолаган. Унинг мақсади - дунёнинг исталган нуқтасида юқори тезликдаги интернетга киришни таъминлаш.