Кличко Меркелни кутиб олиш учун аэропортга қўйилмади

Киев мэри Виталий Кличко Украинага ташриф буюрган Германия канцлери Ангела Меркелни кутиб олиш учун “Борисполь” аэропортига киритилмади. Бу ҳақда Кличконинг ўзи маълум қилди.

“Борисполь” аэропортига протокол бўйича пойтахт мэри сифатида Германия канцлери Ангела Меркель билан учрашиш учун келдим. Худди унинг аввалги сафарларидаги каби. Бироқ бу сафар мени киритишмади. Албатта, куч билан ичкарига киришга уринмайман. Мэр сифатидаги фаолиятим давомида бунақаси биринчи марта юз бермоқда”, деб ёзган Кличко телеграм каналида.

Киев мэри, шунингдек, аэропорт қўриқчиси уни аэропортга киритмаётгани ва буни Кличко “рўйхатда йўқлиги” билан тушунтирган видеосини эълон қилган.

“Мени қизиқтираётгани Украинанинг “Европани қўллаб-қувватловчи” ташқи ишлар вазирлигида протокол тадбирларини зудлик билан бузишга қарор қилишганми? Буйруқни олиб, шундай цирк уюштиришдими?” – деб аччиқ билдирган Кличко.

Меркель Украинага 22 август куни расмий ташриф билан келди. Томонлар учрашув давомида Донбассдаги вазият ва “Шимолий оқим-2” газ қувурини муҳокама қилишган.

Зеленский ва Меркель дастлаб 12 июлда учрашиши керак эди, бироқ ўшанда учрашув бирор бир тушунтиришсиз бекор қилинганди. Кейинроқ Германия ҳукумати канцлер 20 августда Россияга ташриф буюрмоқчилиги, шундан кейин Киевга келишини маълум қилган.

Аввалроқ Украина ОАВлари президент Владимир Зеленский яқин орада Кличкодан ўз лавозимидан кетишини сўраши мумкинлигини маълум қилганди.