Японияда “Якудза” раҳбари ўлимга ҳукм қилинди

Маълумот берилишича, Номора Сатора ва Фумио Таноуэ тўрт кишининг ўлимини ташкиллаштиришда айбланган.

Фото: NHK World-Japan

Япониянинг Фукуока префектураси округ суди “Якудза” жиноий гуруҳининг 74 ёшли раҳбари Номора Саторани осиб ўлдиришга ҳукм қилди. Бу ҳақда Independent нашри хабар бермоқда.

Унинг ёрдамчиси Фумио Таноуэ бир умрга озодликдан маҳрум этилди.

Маълумот берилишича, Номора ва Таноуэ тўрт кишининг ўлимини ташкиллаштиришда айбланган. Терговда аниқланишича, дастлаб Китакусю шаҳридаги балиқчилик кооперативи раҳбари ўлдирилган. Сўнгра Китакусю полицияси офицери, Номора даволанган шифохонада ишлайдиган ҳамшира ва кооператив бошлиғининг қариндошини ўлдиришган.

Судьянинг қайд этишича, жиноятлар ўта ваҳшийлик билан амалга оширилган.

Япония — ўлим жазоси сақланиб қолган ривожланган давлатлардан бири. Япониядан ташқари, АҚШ, Тайван ва Сингапурда жиноятчилар ўлимга ҳукм қилинади.