Маъмурий қамоқ жазосини олган ота алимент пулини тўлади

Хоразм вилояти, Янгибозор туманида яшовчи ота алимент пулидан қарздорлиги туфайли 5 суткага қамалган. Жазони ўтаб бўлгач, алимент пулини тўлиқ тўлаган.

Фото: МИБ

Фуқаролик ишлари бўйича Оҳангарон туманлараро судининг 2014 йилдаги ижро ҳужжатига асосан қарздор М.О. дан ундирувчи С.О. фойдасига 2 нафар фарзандининг моддий таъминоти учун иш ҳақи ва бошқа даромадларининг 1/3 қисми миқдорида алимент ундириш белгиланган.

Ҳужжат Мажбурий ижро бюроси Янгибозор туман бўлимига келиб тушган ва ижро ҳаракатлари бошланган.

Аммо ота алимент тўламаган ва қарздорлик 73 миллион сўмдан ошиб кетган.

Шундан сўнг, МИБ Янгибозор туман бўлими томонидан қарздорга нисбатан «Маъмурий жавобгарлик тўғрисида»ги кодекснинг 474-моддасида назарда тутилган ҳуқуқбузарликни содир этгани бўйича тўпланган ҳужжатлар судга юборилган.

Суд отани 5 сутка маъмурий қамоқ жазосига маҳкум қилган.

Қарздор жазони ўтаганидан кейин 73 млн сўм ҳамда 2 нафар фарзанди 18 ёшга тўлгунга қадар бўлган давр учун тўланиши лозим бўлган алимент пулини тўлиқ тўлаб берган.

Мазкур ижро ҳужжати бўйича мажбурий ижро ҳаракатлари тўхтатилиб, ижро ҳужжатини тамомлаш тўғрисида қарор қабул қилинган ҳамда қарздорга нисбатан қўлланилган чеклов ва тақиқлар тўлиқ бекор қилинган.