Медведчукнинг хотини уни британиялик асирларга алмашишни сўради

«Билишимча, британиялик Эйден Эслин ва Шон Пиннер Украина томонида жанг қилган ва Мариуполда асир тушган. Уларнинг оила аъзоларига мурожаат қилмоқчиман: сиз Британия бош вазири Борис Жонсонга мурожаат қилиб, ундан Украина ҳукуматига таъсир ўтказиб, яқинларингизни Виктор Медведчукка алмашишни сўрашингиз мумкин», деди Марченко.

Кейинроқ Медведчукнинг хотини Россия президенти Владимир Путинга ҳам мурожаат қилиб, Россия ва Украина томони келиша олса, эри британиялик асирларга алмашишларига розилигини айтди. Олдинроқ Россия томони Медведчук бошқа давлат фуқароси экани ва асирлар алмашинуви доирасида керак бўладиган Россия фуқаролигига эга эмаслигини маълум қилганди.

Марченконинг баёнотини Россия ташқи ишлар вазири расмий вакили Мария Захарова ҳам қўллади: «Яқинда Киевга келган Борис Жонсон бўлиб ўтган воқеалардан хабари бор ва тезда жавоб беради деб ўйлайман. Лиз Трасс (Британия ташқи ишлар вазири) эса британлияликлар у ерда нима қилиб юрганини тушунтириб берса керак», деб ёзди Захарова ўз саҳифасида.

Виктор Медведчук украиналик россияпараст сиёсатчи ҳисобланади. У Россия Украинада ҳарбий ҳаракат бошлагач, йўқолиб қолганди. 12 апрел куни Украина президенти Володимир Зеленский Медведчук қўлга олинганини айтиб, уни украиналик асирларга алмашишни таклиф қилди.

Виктор Медведчук қўлга олингач, унинг хотини Оксана Маренко Москвада рус ОАВлари иштирокида матбуот анжумани ўтказди. Ўзининг YouTube саҳифасида қатор давлат раҳбарларига мурожаат қилди. Хусусан, Украина президенти Володимир Зеленскийга, Туркия президенти Ражаб Эрдўғанга, Британия бош вазири Борис Жонсонга, Саудия валиаҳд шаҳзодаси Муҳаммад бин Салмонга ва Россия президенти Владимир Путинга.

Медведчук Украинада давлатга хиёнат ва Россия билан ҳамкорлик қилишда айбланган. У Россия билан яқин алоқада бўлгани маълум. Депутатнинг ўзи Россия президенти Путин қизига чўқинтирган ота бўлганини айтган.