Абрамович «Челси»ни 4 миллиард фунтга сотиш бўйича шартнома имзолади

Битим Буюк Британия ҳукумати ва Премьер-лига томонидан маъқуллангач, Америка консорциуми «Челси» футбол клубининг янги эгасига айланади.

Фото: Getty Images

Россиялик миллиардер Роман Абрамович «Челси» футбол клубини америкалик миллиардер Тодд Боули бошчилигидаги консорциумга сотиш бўйича шартнома имзолади, деб ёзади Британиянинг The Telegraph ва The Guardian нашри, клубнинг ўзи ҳам буни тасдиқлади.

The Telegraph нашрининг ёзишича, келишув қиймати 4 миллиард фунтни ташкил қилади. 2,5 миллиард фунт стерлинг клуб акцияларини сотиб олиш учун ишлатилади, бундан ташқари, клубнинг бўлажак эгалари - «Стамфорд Бриж», футбол академияси ва аёллар жамоаси ривожланишига қўшимча сармоя киритиш учун 1,75 миллиард фунт стерлинг йўналтиради, дейилади «Челси» баёнотида.

Сотув расман якунланишидан олдин америкалик инвестор Буюк Британия ҳукумати ва Англия Премьер-лигасидан рухсат олиши керак. Британия расмийлари клубни сотиш учун янги лицензия бериши керак, сабаби эскиси 31 майда тугайди. Келишув ҳали расман якунланмаган бўлса-да, шартноманинг имзоланиши сотувнинг энг муҳим босқичи ҳисобланади, деб ёзмоқда Британия ОАВ.

LA Dodgers бейсбол жамоаси эгаларидан бири ва Eldridge Industries асосчиси Тодд Боули консорциумнинг «Челси»даги асосий вакили бўлади, аммо энг катта улуш АҚШнинг Clearlake Capital хусусий сармоя компаниясига қарайди, деб қайд этган The Guardian.

Абрамовичнинг «Челси»ни сотишга уринаётгани Россиянинг Украинада ҳарбий ҳаракатлар бошлаганидан кўп ўтмай маълум бўлди. Март ойи бошида Буюк Британия россиялик миллиардерга қарши санкциялар жорий қилди. «Британия Путиннинг Украинага шафқатсиз ҳужумини қўллаб-қувватлаганлар учун хавфсиз бошпана бўлиши мумкин эмас», деди мамлакат бош вазири Борис Жонсон.

Абрамович активларининг музлатилиши унинг клубни сота олмаслигини, «Челси»нинг эса операцион қийинчиликларга дуч келишини англатарди. Натижада мамлакат ҳукумати Абрамовичга уни сотиш учун вақтинчалик лицензия берди.

Абрамович келишувдан тушган соф даромад (2,5 миллиард фунт стерлинг) хайрия ишларига йўналтирилишига ва «уруш қурбонлари»га ёрдам қилишга ваъда берди. Сотув ҳақидаги дастлабки эълондан бери Абрамович жамоаси БМТ ва йирик глобал хайрия ташкилотларидан юқори мартабали вакилларни танлаб олди, уларга хайрия фондини шакллантириш ва унинг фаолияти режасини ишлаб чиқиш вазифаси юкланган, дейилади миллиардер баёнотида.