АҚШ Абрамовични Россияга қарши санкцияларни бузганликда айблади 

АҚШ расмийлари россиялик тадбиркор Роман Абрамовични Америкада ишлаб чиқарилган иккита самолётни лицензиясиз олиб чиқиб кетганликда айбламоқда. Бу ҳақда 6 июнь, душанба куни Reuters хабар берди. Унинг маълумотларига кўра, лицензия АҚШнинг Москвага Украинадаги кенг кўламли ҳарбий ҳаракатларига жавобан жорий қилган санкциялари муносабати билан талаб қилинган. 

АҚШ Савдо вазирлигининг айблов хулосасида таъкидлашича, Абрамович февраль ойида ўз фарзандларини Boeing 787 Dreamliner ва Gulfstream G650 ER самолётларига эгалик қилувчи қатор «сохта ташкилотлар»нинг бенефициарлари деб кўрсатган, бироқ аслида уларни ўзи тасарруф этишда давом этган. 

Суд ҳужжатларига кўра, Манхэттендаги федерал прокурорлар энди самолётларни мусодара қилмоқчи. Манхэттен прокурори Дамиан Уилямснинг идораси томонидан эълон қилинган ҳужжатларга қараганда, судья Сара Кейв Boeing 787 Dreamliner ва Gulfstream G650ER самолётларини хатловга олиш учун ордерни имзолади. 

Boeing март ойидан буён Дубайда, Gulfstream Москвада турибди, деб хабар берди Bloomberg Федерал қидирув бюросига таяниб. 

Абрамовичга ҳеч қачон АҚШ томонидан шахсан санкция қўлланилмаган. У ҳозирча ОАВ хабарларига изоҳ бермади. 

Вашингтон Россия президенти Владимир Путинга яқин ишбилармонларга Кремлни Украинадаги урушни тугатишга кўндириш мақсадида босим ўтказяпти, деб ёзади Reuters. 

Аввалроқ, 3 июнь куни россиялик миллиардер ғарб санкциялари муносабати билан Британиянинг Truphone телекоммуникация компаниясини немис тадбиркори Хоқон Коч ва унинг бизнес шериги Пиррос Куссиосга бир фунт стерлингга рамзий нархда сотгани маълум бўлганди. Бунгача, 6 май куни россиялик тадбиркор «Челси» футбол клубини америкалик миллиардер Тодд Боули бошчилигидаги консорциумга сотиш бўйича шартнома имзолаган.