Қашқадарёда артезиан қудуқда 20 соат қолиб кетган 6 ёшли бола қутқарилди

Махсус техникалар ёрдамида бола қарийб бир суткада қутқариб олинган. Унинг аҳволи яхшилиги айтилмоқда.

Фото: ФВВ матбуот хизмати

Фавқулодда вазиятлар вазирлиги ахборот хизматининг хабар беришича, кеча, 12 июнь куни соат 14:01 ларда Қашқадарё вилояти Чироқчи тумани “Лангар” МФЙга қарашли Лангар қишлоғида яшовчи фуқаро вилоят ФВБга мурожаат қилиб, дала майдонида қазилган, 200 диаметрли сувсиз артезиан қудуққа 6 ёшли ўғли тушиб кетганини айтиб ёрдам сўраган.

Воқеа жойига зудлик билан вилоят ФВБ қутқарувчилари ва тегишли хизматлар куч-воситалари етиб борган. Қутқариш ишларига ФВБ махсус техникалар, яъни экскаватор, грейдер ва бошқа техникалар жалб этилган.

Олиб борилган махсус қутқариш операцияси натижасида бола қарийб бир суткада, бугун соат 10:25 да қутқариб олинган. Айни вақтда боланинг аҳволи яхши. Малакали тиббий хизмат кўрсатиш учун тез тиббий ёрдам ходимларига топширилган.