Кеннедининг жияни АҚШ президентлиги учун курашда иштирок этади

Кенжа Роберт Кеннеди президентлик сайловида Демократик партиядан номзодини қўяди.

Фото: Brian Snyder/Reuters

Қўшма Штатларнинг 35-президенти Жон Кеннедининг жияни, кенжа Роберт Кеннеди 2024 йилда Демократик партиядан президентлик учун курашда иштирок этишини маълум қилди.

«Мен Демократлар партиясидан президентликка номзод эканимни эълон қилиш учун келдим», деди у Бостонда.

«Менинг вазифам - бу кампаниянинг кейинги 18 ойи давомида ва президентлик фаолиятим даврида давлат ва корпоратив ҳокимиятнинг коррупцион тарзда бирлашишига чек қўйиш», деб қўшимча қилди у.

Апрель ойи бошида кенжа Кеннеди 2024 йилги президентлик кампаниясида иштирок этиш учун Федерал сайлов комиссиясига ариза топширган эди.

Америка оммавий ахборот воситаларининг эслатишича, 69 ёшли кенжа Роберт Кеннеди атроф-муҳит бўйича ҳуқуқшунос ва вакцинацияга қарши. У нью-йорклик собиқ сенатор, АҚШ Бош прокурори Роберт Кеннедининг ўғли ва 35-президент Жон Кеннедининг жияни.

Ўтган йили Инстаграм ижтимоий тармоғи унинг аккаунтини «коронавирус ёки вакциналар ҳақидаги рад этилган даъволарни қайта-қайта тарқатгани учун» блоклаган эди.

Кеннеди Демократик партиядан президентликка рўйхатга олинган иккинчи номзод. Аввалроқ ёзувчи Марианна Уилямсон ўз номзодини Демократик партиядан кўрсатишини эълон қилди.

Оқ уйнинг амалдаги раҳбари, Демократик партия вакили Жо Байден президентлик сайловида иштирок этишини ҳали расман эълон қилгани йўқ.